Salin ng “Europa,” ni Werner Aspenström ng Sweden
Salin sa pandaigdigang Filipino ni Roberto T. Añonuevo
Ewropa
Mga huklubang bangkô at katedral,
Mga kornamusa at Zeppelin,
Mga molinong walang mga bagwis.
Mga lalaking nakagora ng balát ng oso.
Mga babaeng may putong na paboreal.
Mga batang mas mapayat sa alambre.
Paano gugunitain ng kapitan ng barko
Ang lahat ng alamat ng nangaglahông isla?
Ewropa?
Anong taon iyon?
Tag-araw ba iyon o taglamig?
Alimbúkad 
Magandang buhay, Sir Bobby! Hinahanap ko ang post mo rito o baka comment mo rin kung bakit EWROPA ang pagbaybay ng EUROPA. Nagtataka rin ako bakit EWROPA. Maraming salamat po, Sir Bobby!
ADRIAN PREGONIR
Banga, South Cotabato
LikeLike
Kung ituturing na mahinang patinig ang /u/, ito ay kakainin ng malakas na patinig na /e/ at magiging /w/, kung susundin ang ortograpiyang Filipino. Bukod dito, binibigkas namang /ew/ ang /ue/ gaya sa Europa kaya ang tunog ay Ewropa kung batayan ang Español. Ang Ewropa ay isang pag-angkin sa panig ng Filipino, at kabilang sa pag-angkin ang panghihimasok kahit sa ispeling nito. Ang Europa, sa aking pananaw, ay isang konserbatibong panghihiram, kahit ituring pang pangngalang pantangi, sapagkat apektado rito kahit ang bigkas sa Filipino.
LikeLike