Salin ng “Dreams of Water,” ni Donald Justice ng USA
Salin sa pandaigdigang Filipino ni Roberto T. Añonuevo
  
 Mga Pangarap ng Tubig
  
 1
 Dumapo ang kakatwang
 Katahimikan nang nasok kami
 Sa maginhawang bar ng barko.
  
 Ang kapitan, na nakangiti,
 Ay iniunat ang kaniyang
 Kataleho saka nagkusang
  
 Ipakita ang malalaswang
 Hugis ng ilang isla,
 Doon sa dulo ng laot.
  
 Umupo ako nang tahimik.
  
 2
 Dumudungaw mula sa dulo
 Ng pantalan ang mga tao
 Na nakasuot ng kapote.
  
 Namuo ang kaunting ulop;
 At ang maliliit na barko,
 Na lalong nangangamba 
  
 Sa kanilang puwesto,
 Ay nagsimulang magreklamo
 Sa malalim at balbasaradong
  
 Tinig ng mga ama.
  
 3
 Magwawakas na ang panahon.
 Ang mga puting veranda
 Ay kumukurba palayo.
  
 Tila hungkag ang hotel,
 Ngunit, nang makapasok,
 Narinig ko ang tampisaw.
  
 Sa kabila ng pinid na pinto’y
 Nakalungayngay ang mga lolo
 Sa mga umaasóng paliguan,
  
 Malalakí, ni hindi namumula.