Wika ng Impostor ni Daedalus mula Myanmar
 
 Roberto T. Añonuevo

 Iharang ang pader ng milyong sundalo,
 Itutok ang baril, sindakin ang mundo;
 Pigiling lumakad ang galít na plakard,
 Dakpin ang sumuway sa huntang mataas.
 Ikulong ang bawat politikong pulpol
 Na handang magwika ng mga pagtutol.
 Itutok ang kanyon sa mga pantalan,
 Barko’y palubugin kung ito’y kaaway.
 Negosyo ng dayo’y ipahintong bigla,
 Kung makikialam sa kawsa ng madla.
 Radyo’t telebisyon ay pilit kamkamin
 Kung ayaw ihinto ang ulat ng lagim.
 Taglay man ni Minos ang lakas at ngitngit
 Hindi niya hawak ang lawak ng langit!